Почитувани членки,

Согласно пријави од наши членки, Ве информираме дека во изминатиот период се забележани зачестени контроли, особено во пределот на Падова и Палманова на територија на Италија, во ноќните часови кога нема можност за реакција до надлежните институции, како и проблемот со јазичната бариера поради која најчесто возачот е принуден да потпише записник со кој се изрекуваат неосновани казни.

Последен проблем со кој се соочи Ваш колега при контрола на возилото од страна на контролни органи во Италија е потврдата за противпожарен апарат (ПП апарат) кој согласно Правилникот за задолжителна опрема на возилото за безбедно учество во сообраќајот е дел од задолжителната опрема во возилото, на потврдата не бил наведен серискиот број на ПП апаратот и затоа на превозникот му е изречена парична казна од 800 евра и заплена на возилото.

Ви напоменуваме да внимавате на сервисниот картон кој е закачен на ПП апаратот да биде целосно пополнет (име на фирма издавач на ПП апарат, име на сопственик на ПП апаратот, сериски број, дата на производство и дата на сервисирање на ПП апаратот), како и доколку имате потврда или записник во истите да бидат наведени сериските броеви на ПП апаратите.

Контролните органи од возачите ги бараат на увид сите документи, прават преглед на техничката исправност на возилото, контрола на тахографот, контрола на исправност на возачката картица и контрола на патните документи, го бараат на увид ЕКМТ дневникот за контрола на првиот превоз кога возилото излегло од Македонија, во циклусот 2+3 превози со цел да се најде можност за изрекување на казна.

Ве предупредуваме пред поаѓање на пат да ги проверувате возилата од аспект на исполнување на техничко-експлоатациони услови, (сите сертификати за возилата, изводи од лиценци и сл.), почитување на правилата за работно време, возење и задолжителни дневни и неделни одмори на возачите, заборавете ги дуплите картици и магнетите, пенкалата кои овозможуваат претходните записи да се избришат и многу други активности кои се прават се со цел да се изврши превоз плус. Казните се многу големи и претставуваат сериозен проблем за одржлив раст и развој на трговското друштво.

Во случај возачот да добие записник на лице место на контролата, на истиот кога ќе се потпише нагласете му дека треба на англиски или италијански јазик да напише „не се согласувам со прекршокот“ со цел да може полесно да го одбраните вашиот став во понатамошната постапка.

Ваш Макам-транс